काठमाडौं । पोर्चुगलका महान् फुटबल खेलाडी क्रिस्टियानो रोनाल्डोले राष्ट्रिय फुटबल टोलीबाट सन्न्यास लिने घोषणा गरेका छन् ।

४१ वर्षीय रोनाल्डोको यो घोषणासँगै पोर्चुगलको जर्सीमा उनको २३ वर्ष लामो अन्तर्राष्ट्रिय खेलजीवन अन्त्यतिर पुगेको छ ।

रोनाल्डोले बिहीबार सामाजिक सञ्जालमार्फत राष्ट्रिय टोलीबाट बिदा लिने आफ्नो निर्णय सार्वजनिक गरेका हुन् । उनले आगामी नोभेम्बरको अन्तर्राष्ट्रिय खेल अवधिपछि पोर्चुगलको राष्ट्रिय टोलीबाट सन्न्यास लिने बताएका छन् ।

‘अब सात नम्बरको जर्सी फिर्ता गर्ने समय आएको छ,’ रोनाल्डोको घोषणाको आशय छ ।

रोनाल्डोले सन् २००३ को अगस्टमा पोर्चुगलको राष्ट्रिय टोलीबाट खेल्न सुरु गरेका थिए । त्यसयता उनले देशका लागि २३४ खेल खेलेका छन् भने १४६ गोल गरेका छन् । पुरुष अन्तर्राष्ट्रिय फुटबलमा सर्वाधिक खेल खेल्ने र सर्वाधिक गोल गर्ने दुवै कीर्तिमान उनकै नाममा छन् ।

उनको नेतृत्व र प्रदर्शन पोर्चुगलले सन् २०१६ मा युरोपेली फुटबल च्याम्पियनसिपको उपाधि जित्दा निर्णायक बनेको थियो । पोर्चुगलले सन् २०१९ मा पहिलो पटक युइएफए नेसन्स लिगको उपाधि जित्दा पनि रोनाल्डो टोलीका प्रमुख खेलाडी थिए ।

पाँच पटक बालोन डी’ओर जितेका रोनाल्डोले क्लब फुटबलमा पनि असाधारण सफलता हासिल गरेका छन् । म्यानचेस्टर युनाइटेड, रियल म्याड्रिड र युभेन्टसजस्ता युरोपका ठूला क्लबबाट खेलेका उनी अहिले साउदी अरेबियाको अल नासरमा आबद्ध छन् ।

रोनाल्डोले राष्ट्रिय टोलीबाट सन्न्यास लिने निर्णय गरे पनि क्लब फुटबलबाट भने तत्काल सन्न्यास लिएको घोषणा गरेका छैनन् । त्यसैले उनको व्यावसायिक खेलजीवन भने जारी रहनेछ ।

सन् २०२६ को विश्वकप आफ्नो अन्तिम विश्वकप हुने यसअघि नै बताइसकेका रोनाल्डोले राष्ट्रिय टोलीबाट बिदा लिने निर्णयसँगै पोर्चुगलका लागि उनको लामो अन्तर्राष्ट्रिय यात्रा पनि टुंगिने चरणमा पुगेको छ ।

विश्व फुटबलमा सर्वाधिक गोल गर्ने खेलाडीमध्ये एक रोनाल्डोले आफ्नो खेलजीवनमा गोल, कीर्तिमान र उपाधिका माध्यमबाट छुट्टै पहिचान बनाएका छन् । अब पोर्चुगलको जर्सीमा उनको अन्तिम खेल कहिले हुनेछ भन्ने विषय समर्थकका लागि चासोको विषय बनेको छ ।

 

प्रतिक्रिया

सम्बन्धित खवर

ताजा समाचार

लोकप्रिय