काठमाडौँ । नेकपा एमालेले प्रदेश अधिवेशन माघको अन्तिम साताका लागि सारेको छ ।
एमाले केन्द्रीय कार्यालयका सचिव भीष्म अधिकारीले कोरोना महामारीको तेस्रो लहर सुरु भएकोले प्रदेश अधिवेशन माघको २८ र २९ का लागि सारिएको बताए ।
‘कोभिडको तेस्रो लहर सुरु भएका कारण माघ ८ गते तय गरेको प्रदेश अधिवेशन माघ २८ र २९ का लागि सारिएको छ,’ उनले भने, ‘पार्टी केन्द्रले यस विषयमा निर्देशन जारी गरिसकेको छ ।’
उनले अधिवेशन सार्नुको अर्को कारण कतिपय जिल्लामा अधिवेशन हुन नसकेको कारण समेत रहेको बताए । त्यस्तै एक नेताले केही नेताहरुको स्वार्थ र पदिय भागबन्डा नमिल्दा कोरोनालाई देखाएर अधिबेशन सारेको समेत बताए ।
मंसिरको अन्तिम साता भएको एमाले केन्द्रीय बैठकले माघ ८ गते एकैदिन प्रदेश अधिवेशन गर्ने निर्णय गरेको थियो ।
