काठमाडौं । नेपाली पासपोर्ट विश्वकै कमजोरको सूचीमा परेको छ । राहदानीबारे अध्ययन गर्ने बेलायती एजेन्सी हेन्ली एन्ड पार्टनर्सले बुधबार सार्वजनिक गरेको सन् २०२२ को सूचीमा नेपालको पासपोर्टको स्थान पहिलेभन्दा तल सूचीकृत भएको हो ।
विश्वकै कमजोर पासपोर्ट हुने पुछारबाट अन्तिम दस मुलुकमध्ये नेपाल उत्तर कोरियाभन्दा तल १०५ औं स्थानमा प्यालेस्टाइनसँगै छ । नेपाल र प्यालेस्टाइनले ३७ देशमा मात्र अनअराइभल भिसा पाउँछन् ।
सबैभन्दा पुछारमा अफगानिस्तान छ । पुछारबाट अन्तिम दशको सूचीमा नेपालसहित उत्तर कोरिया, सोमालिया, यमन, पाकिस्तान, सिरिया, इराक र अफगानिस्तानजस्ता द्वन्द्वग्रस्त मुलुकहरु छन् ।
सूचीको पहिलो स्थानमा जापान र सिंगापुर छन् । यी दुई मुलुकको पासपोर्ट विश्वकै बलियो भएको जनाइएको छ । जर्मनी र दक्षिण कोरिया दोस्रो स्थानमा छन् । फिनाल्यान्ड, इटाली, लक्जेम्बर्ग र स्पेन तेस्रो स्थानमा छन् ।
अमेरिका छैटौं स्थानमा छ । भारत पहिलेभन्दा स्थानमा सुधार गर्दै ८३ औं स्थानमा छ । भारतले ६० मुलुकमा अनअराइभल भिसा पाउँछ । दक्षिण एसियामा माल्दिभ्स सबैभन्दा शक्तिशाली देखिएको छ जसले ३७ मुलुकमा अनअराइभल भिसा पाउँछ ।
बंगलादेशको पासपोर्टले ४१ देश, श्रीलंकाको पासपोर्टले ४२ देश, भुटानको राहदानी बोक्नेले ५३ मुलुकमा अनअराइभल भिसा पाउँछन् । हेर्नूस टपटेन सूची :
यी हुन् शक्तिशाली राहदानी
जापान र सिंगापुर- १९२
जर्मनी र दक्षिण कोरिया- १९०
फिनल्याण्ड, इटाली, लक्जेम्बर्क र स्पेन – १८९
अष्ट्रिया, डेनमार्क, फ्रान्स, नेदरल्याण्ड, स्वीडेन – १८८
आयरल्याण्ड, पोर्चुगल- १८७
बेल्जियम, न्यूजिल्याण्ड, नर्वे, स्वीटजरल्याण्ड, बेलायत, अमेरिका-१८६
पोल्याण्ड, हंगेरी- १८३
लिथुआनिया, स्लोभाकिया- १८२
यी हुन् कमजोर राहदानी
उत्तर कोरिया- ३९
नेपाल र प्यालेस्टाइन- ३७
सोमालिया- ३४
यमन-३३
पाकिस्तान-३१
सिरिया-२९
इराक-२८
अफगानिस्तान-२६
