काभ्रे । खानीखोला गाउँपालिका–४ स्थित श्री कुमारी माध्यमिक विद्यालयले विद्यालयसँग सम्बन्धित विषयमा पछिल्ला दिनमा सामाजिक सञ्जालमा आएका समाचार, टिप्पणी तथा विभिन्न सूचनाबारे आफ्नो आधिकारिक धारणा सार्वजनिक गरेको छ।

विद्यालयले प्रेस विज्ञप्ति जारी गर्दै २०८३ साउन २५ र २६ गते उत्पन्न विवादको विषय आवश्यक कानुनी प्रक्रियाअनुसार खानीखोला गाउँपालिका कार्यालयबाट निराकरण गरिने जनाएको छ। सम्बन्धित सबै पक्षको सहमतिका आधारमा साउन २७ गतेदेखि विद्यालय पुनः सञ्चालनमा आएको विद्यालयले स्पष्ट पारेको छ।

विद्यालयका प्रधानाध्यापक लालबहादुर घिसिङद्वारा जारी विज्ञप्तिमा विद्यालयको शैक्षिक वातावरण, विद्यार्थीको सिकाइ उपलब्धि, शिक्षक तथा कर्मचारीको जिम्मेवारी र विद्यालयको समग्र हितलाई प्राथमिकतामा राखिएको उल्लेख छ।

विद्यालयसँग सम्बन्धित कुनै विषयमा जिज्ञासा, गुनासो वा सुझाव भए सामाजिक सञ्जाल तथा अनधिकृत माध्यमबाट भ्रम सिर्जना गर्नुको सट्टा विद्यालय प्रशासनसमक्ष आधिकारिक रूपमा राख्न** अभिभावक, विद्यार्थी, शिक्षक, सरोकारवाला तथा आम नागरिकलाई आग्रह गरिएको छ।

त्यस्तै, विद्यालयको प्रतिष्ठा, विद्यार्थीको भविष्य तथा शैक्षिक वातावरणमा प्रतिकूल असर पर्ने गरी अपुष्ट सूचना, व्यक्तिगत आरोप–प्रत्यारोप तथा भ्रमपूर्ण प्रचार–प्रसार नगर्न समेत विद्यालयले सम्बन्धित सबैमा अनुरोध गरेको छ।

विद्यालयले पारदर्शिता, अनुशासन, जवाफदेहिता, सहकार्य र गुणस्तरीय शिक्षालाई प्रमुख आधार** बनाउँदै आगामी दिनमा पनि आफ्नो शैक्षिक गतिविधिलाई निरन्तर अघि बढाउने प्रतिबद्धता जनाएको छ।

श्री कुमारी माध्यमिक विद्यालय
खानीखोला गाउँपालिका–४, काभ्रेपलाञ्चोक
प्रधानाध्यापक : लालबहादुर घिसिङ