भोट व्यबस्था पोबादा,
अवस्था पोबादाः
जहनिया राणा शासन
ब्याङसि बाजि प्रजातन्त्र
तिगाइ दिङ आतामान
कुङसि खाजि राजतन्त्र
काप्चि निरंकुश निर्दलिय
पन्चायति म्लाङ ब्यबस्था
च्युइसोम दिङरि रेजि
ह्युल्बा, ब्लिङजि पन्चायत
देप्पेन बाजि प्रजातन्त्र
म्याङजि ताम लाबारि
काठुइ लाबारि, टिबा
सुङ ओर्बारि, छोर्बारि
स्होजि जाम्बुलिङलान ज्याबा
ह्युलठिम, तासाई आर्गुनि
ग्लेखाङ थेन आडेनि
लेबाफेबा लाबा म्लाङ
ह्युलठिम ।
देप्पेन तिगाइ दिङरिन
तिजि ह्युल्बाला कुग्याम
सशस्त्र जनयुद्धला मेल्हाम
ग्लेखाङ बोबारि म्लाङठिम
ख्राङबारि, ल्हुइ च्योल्जि
दिलमाया बम्जनकादेसे
ह्राङला पेजाङ ब्यान्ना
पुङसिन तासाइ धोका
आपिन्नि संगिताकादेसे
आन्दोलनदा, या मि
गुमाइदिसिन तासाइ
आख्लानि ब्राबा दोखाङरि
माइला लामाकादेसे
का सिप्चि शासकले
दिलबहादुर रम्तेलकादेला
हजारौं आमाला कु
थानथान ताजि, कोलाकादे
आबाआमा आरेना ताजि
रोङ रोङ ।
गि ङि आहिन
च्युइ दिङदोन लुङसिन चिबा
मेल्हाम ग्याम्से
लुङजि शान्तिला नाङसाल
तेवा छ्याजि गणतन्त्रला
गणतन्त्र गाडारि ख्रेसि
अमेरिका निबा ह्राङबा
अहिन बिबाकादेन
खाजि गोरगिन ग्यामरि
थोन्जि लाखौं ह्युल्बा
सडकरि, प्लिङजि रिङरोड
म्हिनोन म्हिसे ।
तिगाइ रेरिन गुर्जि
ग्लेखाङ,
ताजि गणतन्त्रला घोषणा
ब्रिबारि ह्युल्बाला ठिम
लातोजि ङ्रिेम दोनाला
चुनाव,
देप्पेन ताजि जालझेल
ब्रिबारि आपुङनि बिबाह्राङबा
स्होजि उदारो ह्युलठिम
खाजि तिगाइ ज्याबा ताम
ताजि ह्युल संघिय
लोकतान्त्रिक गणतन्त्र
स्होजि तह सोमला
सरकार, स्थानिय,
प्रदेश थेन संघ सरकार
दोजि बिजि नाम्सारि
सिंहदरबार,
व्यबस्था पोजि स्युगुरि
म्हि आपोनि, क्रास्या
आपोनि तिल्मालन
थे तासि, खाबा मंसिर
ब्लिरेकुनु आलाना थेन
आताना तोरमार
व्यावस्था जेक्खेन आहिन
अवस्था पोबादा दाम्गे
आखेआबा, आमामाम
नानाआङा ज्योज्योआले
ग्युर्बा आहिन, स्याआइरागरि
खालाईला ग्यार्ज तोङ गि टंगारि ।।

सन्चु ब्लोन तामाङ