काठमाडौँ । जेनजी प्रदर्शनको क्रममा आगजनी र लुटपाट गर्नेहरूमाथि अनुसन्धान गर्नुपर्ने भन्दै प्रहरीमा १०४ वटा जाहेरी परेको छ ।
सोमबार पत्रकार सम्मेलन गरेर जिल्ला प्रहरी परिसर काठमाडौँका एसएसपी रमेश थापाले अहिलेसम्म १०४ वटा जाहेरी आएको बताए । उनले भने, ‘६६ वटा सरकारी कार्यालयबाट हामीकहाँ जाहेरी आएको छ ।’
यसैगरी व्यापारिक प्रतिष्ठानको तर्फबाट १६ वटा र व्यक्तिगत सम्पति आगजनी र लुटबारे अनुसन्धान गर्न आग्रह गर्दै २२ वटा जाहेरी काठमाडौँ प्रहरीमा आएको छ । भदौ २४ मा भएको लुट र आगजनीमा संलग्नहरूमाथि प्रहरीले अनुसन्धान गरिरहेको छ ।
जेनजी प्रदर्शनमा प्रहरीको संरचना, सशस्त्र प्रहरीको संरचना, पशुपति क्षेत्र विकास कोषको संरचना र होटलहरु समेत गरेर २२८ ठाउँमा क्षति भएको थियो । उच्छृङखल गतिविधिमा संलग्न २६७ जनालाई पक्राउ गरिएको जिल्ला प्रहरी परिसर काठमाडौँका एसपी पवन भट्टराईले बताए । उनले भने, ‘पक्राउ परेका मध्ये ८७ जना लाई हाजिर जमानीमा राखेर अनुसन्धान गरिरहेका छौँ ।’
पक्राउ परेका ११३ आरोपीहरू काठमाडौँ प्रहरीको हिरासतमा छन् । ३३ जना धरौटीमा छुटेका छन् । अदालतको आदेशले ४३ जना पुर्पक्षको लागि थुनामा गएका छन् ।
